खानापूर: गोपाळ देसाई यांच्या गटाने वाकडी वाट करीत बुडाखाली शेपूट घातल्यामुळे एकीचा प्रयत्न पुन्हा बारगळला. माजी आमदार दिगंबर पाटील यांच्या गटातील नेत्यांनी मनाचा मोठेपणा दाखवित गोपाळ देसाई गटाच्या आंदोलनस्थळी जाऊन मनधरणी करण्याचा प्रयत्न केला. त्यासाठी गर्लगुंजी येथील माऊली ग्रूपने महत्वाची भूमिका बजावली. पण, त्यांच्याही आपेक्षांवर विरजन पडले.
किमान काळ्यादिनी तरी दोन्ही समित्या एकीची संधी साधतील, असा तालुकावासीयांचा होरा होता. पण नेत्यांच्या स्वार्थापुढे सीमालढ्याच्या अस्मितेनेही गुडघे टेकल्याचा लाजिरवाणा प्रकार मराठी भाषिकांना पहावयास मिळाला. काळ्यादिनाच्या पूर्वसंध्येला गर्लगुंजी येथील माऊली ग्रूपच्या पुढाकाराने सर्व नेत्यांनी एकीचा निर्धार जाहीर केला होता. त्याप्रमाणे दुपारपर्यंत झालेल्या वाटाघाटीनंतर गोपाळ देसाई यांच्या गटाच्या म्हणण्यानुसार दिगंबर पाटील यांच्या गटाच्या नेत्यांनी आणि कार्यकर्त्यांनी मनाचा मोठेपणा दाखवित लक्ष्मीमंदिरात जाऊन समेटाचा प्रयत्न केला. पण, गोपाळ देसाई यांच्या गटाच्या नेते-कार्यकर्त्यांचा हेकेखोरपणा पुन्हा चव्हाट्यावर आला.
दिगंबर पाटील यांच्या गटाचे नेते-कायरकर्त्यांनी विनाअट भेटीचे निमंत्रण स्विकारले. पण, त्याची कदर गोपाळ देसाई यांच्या गटाने केली नाही. त्याउलट बेकीची दरी रूदावण्याचाच प्रयत्न त्यांच्या नेत्यांनी केला. कांही कार्यकर्त्यांनी मात्र त्यांच्या या वर्तणुकीचा निषेध नोंदवित दिगंबर पाटील यांच्या पाठीराख्यांसह शिवस्मारकात जाऊन सभेला हजेरी लावली. त्यामुळे गोपाळ देसाई यांच्या गटातील झारीतल्या शुक्राचार्यांचे मनसुबे जवळपास उघड झाले.
एक कॉल आला, अन्‌…
माऊली ग्रूपच्या नियोजनानुसार हणमंत मेलगे, रमेश धबाले, कृष्णा कुंभार यांनी गोपाळ देसाई गटाची भेट घेतली. बराचवेळ चाललेल्या चर्चेनंतर दिगंबर पाटील गटाच्या नेत्यांनी लक्ष्मी मंदिरात यावे, अशी अटकळ घालण्यात आली. सुरूवातीला दिगंबर पाटील गटातील कांहीनी या निमंत्रणाला विरोध केला. पण, चर्चेनंतर जेष्ठ नेते वगळता सर्व नेत्यांनी लक्ष्मी मंदिरात जाऊन भेट घेतली. समर्पक चर्चेची आवश्यकता असतांना गोपाळ देसाई यांच्या पाठीराख्यांनी अटी घालण्यास सुरूवात केली. त्याला विरोध झाल्याने गोंधळ माजला. एकी होणार नाही, असे दोन्ही गटातील नेत्यांनी जवळपास जाहीर केले. खरतर एकी निश्चित होती. परंतू, एक कॉल आला आणि होणारी एकी फिस्कटली. तो कॉल कुणाचा होता?
One thought on “‘एकी’ची शेपूट पुन्हा बुडाखाली!”