भीषण अपघात: ट्रक पलटी होऊन १४ जण जागीच ठार

समांतर क्रांती / कारवार

कारवार जिल्ह्यातल्या यल्लापूर तालुक्यातील अरेबैल घाटात आज पहाटे फळे – भाजीपाल्या वाहतूक करणारा ट्रक पलटी झाल्याने १४ जणांचा जागीच मृत्यू झाला तर  १६ जण गंभीर जखमी असल्याची माहिती समोर आली आहे. मृतांना आणि जखमीना यल्लापूर येथील सरकारी आरोग्य केंद्रात सध्या दाखल करण्यात आले आहे.

हावेरी जिल्ह्यातील सावनूर येथून ४० व्यापारी भाजीपाला आणि फळे भरून घेऊन या ट्रकमधून कुमटा येथे येत होते. त्यावेळी राष्ट्रीय महामार्ग ६३ वर अरेबैल घाटात गुल्लापूर जवळ हा अपघात घडला. चालकाचे ट्रकवरील नियंत्रण सुटल्याने हा भीषण अपघात घडला असून या वर्षातील जिल्ह्यातील हा सर्वात मोठा अपघात घडला आहे. घटनास्थळी पोलीस व स्थानिकांच्या मदतीने मृतांना आणि जखमीना आरोग्य केंद्रात दाखल केले आहे. या घटनेतील मृतांचा आकडा वाढण्याची शक्यता आहे.