नंदगड पोलीस स्थानक हद्दीत घरफोड्या करीत चोरांचा धुमाकूळ

समांतर क्रांती वृत्त

नंदगड: शिपेवाडी आणि करंजाळ येथे आज गुरूवारी घरफोड्या केल्याच्या घटना उघडकीस आल्या. त्यामुळे नंदगड पोलीसांची अक्षरश: झोप उडाली आहे. तीन ठिकाणी चोरी झाली असून यात पाच तोळे सोन्याचे दागिण्यासह चांदी आणि रोकड लंपास करण्यात आली आहे.

याबाबत नंदगड पोलिसांकडून समजलेली अधिक माहिती अशी, शिंपेवाडी येथील सुरेश जयराम पाटील हे त्यांच्या कुटुंबीयांसमवेत शिवारात कामाला गेले असता अज्ञात चोरट्यांनी त्यांच्या घराचा समोरील दरवाजा तोडून घरात प्रवेश केला. तेथून चार तोळे सोने, २५ तोळे चांदीचे दागिणे आणि १४ हजारांची रोकड चोरट्यांनी पळविली. याच दरम्यान करंजाळ येथील परशराम गणेश लक्केबैलकर यांच्या घरातही चोरी झाली असून त्यांच्या घरातून एक तोळे सोने, ५ तोळे चांदी आणि चार हजारांची रोकड लंपास करण्यात आली आहे. म्हात्रू गणेश लक्केबैलकर यांच्या घरातही चोरीचा प्रयत्न झाला आहे.

याबाबत नंदगड पोलिसांत तक्रारी दाखल झाल्या असून श्वान पथकाच्या मदतीने चोरांचा माग काढण्याचा प्रयत्न पोलिसांनी केला. परंतू, त्यात यश आले नाही. चोरांचा शोध सुरू असल्याचे पोलिसांकडून सांगण्यात आले.