म.ए.समितीची भाकरी परतणार की करपणार?

• तालुका म.ए.समितीची महत्वाची बैठक शुक्रवारी (ता.१६) आयोजित करण्यात आली आहे. विधानसभेच्या निवडणुकीनंतर पराभवाची कारणमिमांसा शोधण्याचा प्रयत्न समितीने केला नाही. त्यामुळे कार्यकर्त्यांत नाराजी पसरली असतांना उद्या होणाऱ्या बैठकीत तरी संघटनात्मक कार्य आणि कार्यकारिणीबद्दल निर्णय घेतला जाणार का? याकडे मराठी भाषिकांचे लक्ष लागून राहिले आहे.

विधानसभा निवडणुकीत समितीचे उमेदवार मुरलीधर पाटील यांना दारूण पराभवाला सामोरे जावे लागले. त्यानंतर झालेल्या कार्यकारिणीच्या बैठकीत केवळ तोंडदेखली चर्चा झाली. पण, पुढील काळात समितीला उर्जितावस्था मिळवून देण्याबाबत ठोस चर्चा झालीच नाही. समिती नेत्यांचे काय चालले आहे, असा प्रश्न सामान्य मराठी भाषिकांना पडला असून कार्यकारिणीच्या सर्व पदाधिकाऱ्यांनी राजिनामे द्यावेत, अशी मागणी होत आहे. कांही कार्यकर्ते आणि नेत्यांनी मुरलीधर पाटील यांची भेट घेऊन भाकरी परतण्यासाठी पुढाकार घेण्याची विनंती केली होती.

खरंतर, पदाधिकाऱ्यांनी दारूण पराभवाची नैतिक जबाबदारी स्विकारून तात्काळ राजिनामे देणे आवश्यक होते. पण, तसे न घडल्याने त्याचे पडसाद आता उमटत असून शुक्रवारी होणाऱ्या बैठकीत या विषयावर घमासन होण्याची शक्यता आहे. त्याला पदाधिकारी कसे तोंड देणार? राजिनामे देणार की पुन्हा खुर्च्या गरम करणार? असा प्रश्न विचारला जात आहे. वेळीच भाकरी परतली नाही तर ती करपून जाईल, असे मत निष्ठावंत कार्यकर्त्यांतून व्यक्त होत आहे.

बैठकीला उपस्थित राहण्याचे आवाहन

शुक्रवारच्या बैठकीत सरकारी इस्पितळावर मराठीतून फलक लावण्याच्या मागणीचा पाठपुरावा करण्यासंदर्भात चर्चा करण्यात येणार असल्याचे अध्यक्ष गोपाळ देसाई यांनी म्हटले आहे. वाढीव वीजबिल आणि संघटनात्मक वाटचालीवरही बैठकीत चर्चा केली जाणार असून मराठी भाषिकांनी मोठ्या संख्येने उपस्थित राहण्याचे आवाहन त्यांनी पत्रकाद्वारे केले आहे.