खानापुरात पाऊस, मात्र उष्णता कायम

खानापूर:  शहर परिसरासह तालुक्याच्या ग्रामिण भागात तब्बल तासभर पावसाने हजेरी लावली. कांही काळ वातावरणात गारवा निर्माण झाला होता, पण पुन्हा उष्णता वाढली. दुसऱ्यांदा आज शनिवारी पावसाने हजेरी लावल्यामुळे समाधान व्यक्त होत आहे.

गतवर्षी पावसाने हात दिला होता. त्यामुळे तालुक्यातील नदी-नाल्यांत मुबलक पाणी साठा होऊ शकला नव्हता. सध्या सर्वच नदी-नाल्यात ठणठणाट आहे. अंतरजल पातळीतदेखील कमालाची घट झाली आहे.  अशा स्थिती शेतकरी हवालदिल झाला आहे. गेल्या महिनाभरापासून आवकाळीची आपेक्षा होती पण, पाऊस वाकुल्या दाखवीत होता.

दोन आठवड्यांपूर्वी सरी कोसळल्या होत्या, त्यानंतर आज पुन्हा पावसाने हजेरी लावली. पावसाला सुरूवात होईल, अशी आशा शेतकऱ्यांना आहे. दमदार पाऊस न झाल्यास मात्र मशागतीची कामे रेंगाळणार आहेत. शिवाय धुळवाफ पेरणीचे संकट ओढवणार आहे. हवामान खात्याने यावेळी वेळेत आणि मुबलक पावसाची शक्यता वर्तविली आहे.