नेरसे फाट्याजवळ दुचाकीला कारची धडक; दोघे गंभीर जखमी

समांतर क्रांती / खानापूर

खानापूर-अनमोड मार्गावरील नेरसे फाट्याजवळ कारने दुचाकीला मागून ठोकरल्याने झालेल्या अपघातात दोघेजण गंभीर जखमी झाल्याची घटना घडली आहे. या अपघातात लकमान्ना सन्नाप्पा हणबर ( ६५, मुडगई) आणि मल्लव्वा महेश गावडे (४५, जगलबेट, ता.जोयडा) हे जखमी झाले असून त्यांच्यावर येथील सरकारी रुग्णायलात प्रथमोपचार करून अधिक उपचारासाठी बेळगावला हलविण्यात आले आहे.

घटनास्थळावरून मिळालेली अधिक माहिती अशी, जखमी लकमान्ना आणि मल्लवा हे अंत्यसंस्कारासाठी निघाले होते. नेरसे फाट्यावर मागून आलेल्या कारने (एमएच ०२ जीपी ८४७७) मागून ठोकर दिली. यात दुचाकी रस्त्याच्या बाजुला गटारीत पडली. तसेच लकमान्ना आणि मल्लवा यादेखील दुचाकीवरून बाजूला पडून त्यांना जबर मार बसला. लकमान्ना यांच्या पायाला तर मल्लव्वा यांच्या हाताला जबर मार बसला असून मोठ्या प्रमाणात रक्तस्त्राव झाला आहे. त्यामुळे त्यांना अधिक उपचारासाठी बेळगावला हलविण्यत आले.

सदर घटनेची माहिती मिळताच खानापूर पोलिसांनी घटनास्थळी जाऊन पंचनामा केला.